İlin yekunları

2015-2016-cı tədris ilinin son iş günü- sona yetməkdədir. Bu gün Masallı RTŞ-də 2015-2016-cı tədris ilində buraxılış imtahanlarının nəticələrinə həsr olunmuş yığıncaq keçirildi. Və məlum oldu ki,məktəbimiz-Nadir Aslanov adına Miyankü kənd tam orta məktəbi-ən yüksək nəticə ilə tədris ilini rayonda birinci yerdə başa vurmuşdur. Bu münasibətlə ilk növbədə məktəbdə bu nəticənin əldə olunmasında xidməti olan hər kəsi (müəllim,şagird,texniki işçi) məktəb rəhbərliyi adından təbrik edir və gələcəkdə də belə uğurları təkrarlamağı arzu edirəm. Bu nəticə barədə mənim,məktəbin rəhbəri kimi,xüsusi münasibətim var və bunu məktəbdə ilin yekunlarına həsr olunmuş Pedaqoji şurada bildirmişəm.
Qayıdaq RTŞ-nin tədbirinə. Şübhəsiz burada rayon məktəblərində aparılan işin nəticələri müzakirə olundu.Qazanılan uğurlar və buraxılan səhvlər təhlil olundu.Qarşıda duran vəzifələr barədə tapşırıqlar verildi. Bu yığıncaqda aparılan müzakirələr fonunda məktəbimizdə görülən işlər barədə fikirlərimi bölüşmək istəyirəm:
Bu gün məktəbdə tədris prosesinin uğurlu təşkilinə mane olan kifayət qədər səbəblər var. Bu səbəblərə varmadan (bir anlıq onları unudaraq) pedaqoji kollektivin görməli olduğu və gördüyü işlərə qısaca nəzər salaq:
Şübhəsiz,tədris prosesinin mərkəzində MÜƏLLİM dayanır. Müəllimin sinifdə yüksək nəticəli fəaliyyətə hesablanmış iş görməsi üçün məktəb rəhbərliyinin müəllimə qarşı tələbkarlığı ilə ona göstərdiyi qayğı adekvat olmalıdır.Məktəbimizin imkanları çərçivəsində bütün işlər məhz bu adekvatlığa hesablanmışdır.
Dövlətin təhsil siyasəti təhsilalanlara ( ŞAGİRDə) yönəlib. Yəni müəllim də,məktəb binası da, işçilər də ŞAGİRDin yüksək səviyyəli vətəndaş kimi formalaşmasına xidmət edir. Bunun üçün elə etmək lazımdır ki, sinif-dərs sistemi daha maraqlı olsun. ( maddi-texniki bazanın olması vacib şərtdir) Belə olan şəraitdə şagird dərsdən yayınmaz və sinifdə maraqlı olanları öyrənməyə can atacaq. Kollektivimiz bu vəzifənin də öhdəsindən,məktəbin imkanları çərçıvəsində, layiqincə gəlməyə çalışmışdır. Bunun da nəticəsində sona çatmış tədris ilində davamiyyətlə bağlı problemimiz olmamışdır. 
Müasir məktəbdə uğurlu nəticə qazanmaq üçün VALİDEYN-nin rolu danılmazdır.Etiraf etməliyəm ki,valideynlərlə münasibətdə görüləcək işlər hələ kifayət qədərdir. Müasir təlim texnologiyalarıyla tanış olmayan valideynlərlə maarifləndirmə işləri aparmaq,onları şagirdlərə bacarıqlı köməkçi kimi formalaşdırmaq günün tələblərindəndir.
2015-2016-cı tədris ili Masallı təhsili üçün olduqca gərgin keçmişdir. Təhsil Nazirliyinin nümayəndələri bir neçə dəfə rayonda olmuş və məktəblərdə monitorinqlər keçirməklə inkişafın səviyyəsini nəzarətdə saxlamağa çalışmışlar. Sözsüz ki bu monitorinqlər rayon səviyyəsində müəyyən uğurlu nəticələrə gətirib çıxarmışdır. Onu da deyim ki, məktəbimizin kollektivi hələ 2013-2014-cü tədris ilndən başlayaraq mütəmadi olaraq IX və XI siniflərdə bu işin təşkilinə nail olmuşdur.
Müasir təhsil sistemini İKT-siz təsəvvür etmək mümkün deyil. Məktəbimizdə İKT-dən istifadə günün tələbləri səviyyəsində olmasa da rayonun əksər məktəblərindən daha yaxşı təşkil olunmuşdur. Məktəbin veb saytı (https://miyanku-mektebi.webnode.ru/) fəaliyyət göstərir.Facebook sosial şəbəkəsində məktəbin səhifəsi (https://www.facebook.com/groups/miyankumektebi/) daim yenilənir. Müəllimlərin əksəriyyətinin Facebook,Twitter və digər sosial şəbəkələrdə səhifələri və yaxud qrupları vardır. Şagirdlərimizin də böyük bir hissəsi bu xidmətlərdən yararlanır. Məktəbimizin facebook səhifəsində və digər təhsil qruplarında müəllimlərimizin hazırladığı minlərlə KSQ və BSQ yerləşdirilmişdir ki,rayon və respublikanın təhsil ictimaiyyəti bu yazılardan yararlanır.
Maraq doğuran məsələlərdən biri də məktəbdə yeni yaradılan müəllim və şagirdlərin online görüşmələridir. (distant təhsil) Belə ki,şagird istənilən vaxt tədris prosesində rastlaşdığı problemlərlə bağlı müəllimlərlə online əlaqə saxlayır.
Əlavə etsək ki, müəllimlərimiz başa çatan tədris ilində baş tutan diaqnostik qiymətləndirmədən də müvəffəqiyyətlə keçmişlər (orta nəticə 75%) əldə olunan uğurun haradan qaynaqlandığı aydın olur.
Sözsüz ki, tədris ili problemlərsiz də keçməmişdir. Bu problemləri kollektivimiz yaxşı bilir. İnşallah növbəti tədris ilində həmin məsələlərə daha çox diqqət ayırmaqla həll etməyə çalışacağıq.